| 這個7月,諸事不順,雖未列入為人生最運滯的一個月(因為過去實在太多黑日子),但一個月內不斷遇上古古怪怪的事,出現盲頭烏蠅式的白忙碌,一個月之後,我發覺我瘦咗,肚腩仔無咗,皮膚緊咗,色班斑無咗,朋友多咗,個人有自信心咗,老闆對我好咗,仲諗住加我人工添.................!
爛gag完畢,又想用小小時間自瀆一番。敝誌脫稿期間,瀏覽量竟與平日差不多,還竟然收到熱心讀者慰問。當xanga在老媽日常生活的重要排名愈來愈低,今日無論如何都要寫幾隻字! 為報答讀者,老媽決定今次賣大包,寫個我一直不肯寫的題材: 大胸。
大胸之所以難寫,是因為弄得不好,又惹來「扮銀晒野」的指控,但我知道,其他大胸女生都會支持我,所以決定解禁。
更憎自己的尊容,都未想過要整容。我不信奉「女人靠長相搵食未免太可悲」,覺得有這種想法的女人應該都是滿懷妒忌心的醜八婆。亦舒都講過,如果一個女人未靠過色相達到目的,那未免太可悲(大意)。
話說回來,一日與同事閒聊,她提到一個首次令老媽心動的整容手術--「縮胸」。
同事:「你知唔知女人老咗,心口可以落到幾低?」
老媽比劃一個位置。
同事搖頭,「係肚臍咁低。我健身時見到d鬼婆可以墮到落肚臍。」
老媽倒抽一口冷氣,「唔係卦?」
「係。所以我已經留定筆錢,老咗做縮胸手術。情願細,都不要墮。」
她實在太對。上天給你一對豐胸,「威」(實情唔威,見下文)足咁多年,臨尾都係要收利息。
隨即又咕嚕,點解做女人咁煩? 又有月經,又要戴bra,細波又要加pad,夏天有多熱要多熱,要不就與矽袋做朋友,帶住佢周圍走,而家竟然加多一項,就係大波老婦老咗要吃手術之苦,晚來縮胸去,所以女人成日發脾氣,係完全有道理。
正所謂「做一行,厭一行」,做大胸女人有以下苦處:
1. 工作犯小錯,言行有過失,即被判「波大無腦」罪;
2. 在香港永遠買衫衣不稱身: 買大一個碼,肩頭位、脥位太闊。買小一個碼,一係扣不到鈕,一係被指太緊身,唔知搏乜;
3. 永遠贏到男人的注視,但如果知道男人注視背後那堆污穢聯想,情願他不要望;
4. 總有賤男人在擦身而過時細細聲說:「個波好大呀!」、「被我 渣下就好」,或者過馬路時停在交通燈的貨車司機大叫:「大波妹!」;
5. 容易在進食時,沾污衣服;
6. 大胸的矮女子是不能寫領口太高的衣服,視覺上會顯得又肥又矮,但同第2點一樣,領口太低又引來發姣的指控;
7. 永遠買不到又平又合身的bra, 會有店員夠膽拿一個細兩個cup的bra,叫你試一試;
8. 買不到合身的bikini;
9. 任何運動都成為難題;近年發現瑜伽例外;
10. 別人說話時,不是望住你,是望住你的胸,不要以為男人才會這樣,更多時是女人盯住女人的胸部看。
我知道,看官讀到這裡會問,畀你揀情願要大定要細。
細胸一樣有另外10個苦處,所以做人都只能既來之,則安之。
|
